كلمتين اتقالو فى ساعة فضا

السلام عليكم يا اهل المنتدي
كلمتين كده لقيت نفسي فاضيه وعايز اقولهم . ومحدش يقولي يا سلام يعني كل ما هتبقي فاضيه هتصدعينا .... هما اللي قالولي اكتبي موضوع في المنتدي وانا قلت اجي اصدعكوا شويه .
يعني محدش سالني ايه هما الكلمتين .... عموما اقول انا من غير ما حد يسال .
انتوا قاعدين بتعملوا ايه الاول ،، فاضيين كالعاده صح .. ما انا عارفه طبعا .. قاعدين للرغي والشات والفرجه علي التلفزيون والنوم وبس ... يا حلاوه اكل ومرعي وقله صنعه .
البيه اللي هناك ده مش بيشتغل ليه ، وصاحبه اللي جنبه قاعد بيعمل ايه ،، واللي علي القهوه بيشيش ليه .. يا دي النيله محدش بيعمل حاجه عدله . عادي بقي ما احنا فاضين .
يا نهار يا نهار الواد طول بعرض وقاعد يعاكس اللي رايحه و اللي جايه مش عيب عليك وعلي طولك يعني لو كانت اختك كنت ترضي بكده . عادي بقي ما احنا فاضين .
ولا اللي في البلكونه ده كمان ماسكلي الموبايل ومن نمره لنمره يا قلبي لا تحزن و وكل نمره فيهم اعبط من التانيه ومصدقه اللي بيتقالها . عادي بقي ماحنا فاضيين .
كلوا كوم و الهوانم اللي قاعدين قدام التليفزيون دول كوم تاني قالبي في الفضائيات براحتك يا حبيبتي انتي وهيا شوفتي مسلسل الجديد بتاع نور الشريف ولا الكليب الجديد بتاع الواد القمر اللي اسمه سامو زين ،،، كله كوم و كليب هيفاء الجديد كوم تاني شفتي فستانها ولا تسريحتها هي عمله عمليه جديد ولا عملت ريجيم . طبعا ما احنا فاضيين
ااااااااااااااه منكوا اه تعبتوني لا واحد قاعد يذاكر ولا واحد قاعد يشتغل كلوا ضايع . محدش قال تعالوا نعمل حاجه مفيده .
محدش قال لصاحبه ده وده تعال نتعلم حرفه ونعمل مشروع صغير بدل القهوه والشيشه والكلام الفاضي . مفيش واحده قالت لصاحبتها تعالي نروح مدرسه خياطه ونتعلم ونعمل حاجات بسيطه تنفع لمشروع صغير .
يعني لو كل 3 او 4 اصحاب اتلموا وعملوا حاجه سوا مش هيبقي احسن . ما تيجوا نجرب ومش هنخسر حاجه ما كده كده الوقت ضايع في تفاهات ...
تعالوا نجرب نستفيد من الوقت ده شويه ... التجربه مش هتنقصنا بالعكس ممكن تزودنا ... مسمعتش صوت حد يعني قالي انا معاكي .... مفيش واحد جه من علي القهوه ولا واحد ساب الموبايل ولا واحده قفلت التليفزيون وقالت معاكي ...
يا بشررررررررررررر ياللي هنا يا اهل المنتدي ردوا عليا : .... وحدي انا يا غلبان بنادي علي اللي تايه واللي تايهه طب ملقيش منادي معايا يقول يا تايهين .....
اخوكم كوتا